जिल्ला बचत तथा ऋण सहकारी संघ ललितपुरमा चुनावी माहौल, को बन्ला अध्यक्ष ?
ललितपुर, फागुन १४ । मौसम चिसो छ, तर यो मौसमले सहकारी क्षेत्रलाई भने छोएको छैन । यतिवेला ललितपुर बचत तथा ऋण सहकारी संघको चुनावी माहौलले तातेको छ । संघको फागुन १८ गते हुन लागेको २४ औ साधारणसभा र सञ्चालक समितिको चुनावले ललितपुर सहकारी क्षेत्रको माहौल निक्कै तातेको हो । हाल बचत संघमा जिल्लाका ५११ संस्था आबद्ध रहेका छन् ।
दुई कार्यकाल समाप्त भइसकेर पनि तेस्रो कार्यकालको दाबी गर्दै आएका हालका अध्यक्ष रामशरण घिमिरे र हालका सचिव रामहरि बजगार्ईबिच प्रतिस्पर्धा हुने भएको छ ।
संघको स्थापना कालदेखि नै ललितपुर बचत तथा ऋण संघमा प्रजातान्त्रिक धारका सहकारीकर्मीहको बचस्व रहेको छ । यसपालिको निर्वाचनमा पनि त्यो विरासत जोगाउन चाहन्छन् रामशरण घिमिरे । उनी सञ्चालक समितिमा आफ्नो प्यानल नै बनाएर अघि बढेका छन् । त्यसैगरी नेकपाले पनि रामहरि बजगाईको नेतृत्वमा प्यानललै घोषणा गरी अघि बढेका छन् ।
ललितपुर जिल्लामा रहेका ११ सयभन्दा बढि प्रारम्भिक सहकारी संस्थाहरुमा आबद्ध २ लाख जना भन्दा बढि ब्यक्तिहरुको विश्वास जित्दै ललितपुर जिल्ला बचत तथा ऋण सहकारी संघ लि.मा २ पटक अध्यक्ष पदमा निर्वाचित घिमिरे बिपक्षहरुलाई समेत प्रभाव पार्दै मन जित्न सफल युवा सहकारीकर्मी रुपमा चर्चामा आइरहेका छन् । ‘आफू अध्यक्षमा निर्वाचित भएमा केन्द्रकृत कारोबारलाई क्षेत्रीय रुपमा सेवा केन्द्र स्थापना गरी सेवा दिन तत्पर रहेको छु ।’ अध्यक्षका प्रत्यासी रामशरण घिमिरेले दैनिकीन्युजलाई बताए । उनले भने, ‘पहिलो कार्यकालमा ३० लाखको संस्थालाई ७ करोड, दोस्रो कालमा ५० करोडको संस्था बनायौं ।’ तेस्रो कार्यकालमा संघले आफ्नै घरबाट सेवा दिने उनको दाबी छ । सहकारीमा देखिएका विभिन्न विसंगतिलाई हटाउने उनको भनाई छ ।
यता नेकपाका तर्फबाट उम्मेदवार बनेका रामहरि बजगाई संघ र संस्था बीचको सम्बन्ध प्रगाढ बनाउने, स्थानीय निकायसँग र सहकारीबीचको अन्तरसम्बन्ध बढाउने, सहकारी संस्थाको समस्या पहिल्याउने र समाधान गर्ने र सहकारीलाई नीति, विधि, पूँजी र प्रविधिमा लैजाने आफ्नो एजेण्डा रहेको बताए ।
घिमिरेलाई कसको साथ ?
घिमिरेलाई सहकारीकर्मीहरुको पूर्ण साथ र सहयोग रहदै आएको छ । उनी दुई कार्यकाल अध्यक्ष भएकोले ललितपुरका अधिकांश सहकारीकर्मीहरुको साथ छ । बचत तथा ऋण सहकारीहरुको करिव ६५ प्रतिशत साथ घिमिरेलाई छ । त्यसैगरी उनलाई प्रजातान्त्रिक धारको पनि पूर्ण सहयोग र नेकपा भित्रका केही असन्तुष्टहरुको साथ र सहयोग रहेको घिमिरेको दाबी छ । घिमिरेले दुई कार्यकाल अध्यक्ष हुँदा धेरै सहकारीहरुको समस्या समाधान गर्नका लागि ठूलो भूमिका निर्वाह गरेका कारण पनि सहकारी क्षेत्रमा उनलाई साथ दिनेहरु धेरै नै रहेका छन् । ललितपुर बचत संघलाई आजसम्मको अवस्थामा ल्याउन उनले ठूलो भूमिका खेलेको उनी पक्षधरका सहकारीकर्मीहरुको दावी छ । तल्लो तहमा अत्याधिक रुचाइएका कारण पनि निर्वाचन उनको पक्षमा पर्ने अनुमान गर्न सकिन्छ । उनी स्थापना कालदेखिका अध्यक्ष पनि हुन् ।
बजगाईलाई कसको साथ ?
हालका सचिव रहेका रामहरि बजगाईलाई नेपाल कम्युनिष्ट पार्टी (नेकपा) को सहयोग छ । उनी सचिव हुँदा नेकपा निकटका सहकारीकर्मीहरुको भवना अनुरुप काम गर्न नसक्दा उनको पार्टीभित्रै आलोचना गर्ने धेरै छ । उनका विरुद्धमा नेकपमा भित्र पनि मोर्चाबन्दी देखिएको छ । कुरा मिठा गर्ने र काम केही पनि नगर्ने उनीमाथि लागेको आरोप छ ।
को हुन् घिमिरे ?
ललितपुर जिल्ला, देवीचौरमा जन्मेका घिमिरे सहकारी क्षेत्रको एक अभियन्ता हुन् । घिमिरे सहकारी मार्फत जनतालाई आर्थिक रुपमा बलियो बनाउन सकिन्छ भन्ने सपना देखेर सहकारीसँग जोडिएका हुन् । घिमिरे बचत संघको स्थापनाकालदेखि अध्यक्ष हुन् । साथै उनी अरुणिमा बचत तथा ऋण सहकारी संस्थाका अध्यक्ष समेत हुन् । संघको उन्नति र प्रगतिमा ठूलो भुमिका खेलेकाले घिमिरेलाई सहकारीको लविङ गर्ने एक मात्र योद्धा मानिन्छ । उनले सहकारी ऐन—२०७४ मा सहकारीलाई मजबुत बनाउनका लागि ठूलो भुमिका खेलेको सहकारी क्षेत्रमा चर्चा छ । कुनै पनि परिस्थितिमा आबेग र उत्तेजनात्मक परिस्थितिभन्दा बाहिर रहेर समन्वय, सहकार्य र सफल नेतृत्वदायी भूमिका निर्वाह गर्न सफल घिमिरे सामूहिक हितका लागि सहकारी अभियानमा नेतृत्वदायी भूमिका निभाउदै आएका छन् ।
को हुन् बजगाई
काभ्रे जिल्लामा जन्म भई हाल ललितपुरको महालक्ष्मी नगरपालिका वडा नं. १ इमाडोल निवासी बजगाई राष्ट्रिय सहकारी बैँक लि. सञ्चालक तथा प्रतिभा बचत तथा ऋण सहकारी संस्था लिमिटेडका अध्यक्षसमेत हुन् । उनको जलविद्युत कम्पनी, दुग्ध उद्योग, अक्सिजन प्लाट लगायत विभिन्न उद्योग व्यवसायमा लगानी रहेको छ । उनी पूर्व नेकपा (माओवादी केन्द्र) महाँलक्ष्मी नगर कमिटीका कोषाध्यक्ष समेत थिए । हाल उनी जिल्ला बचत तथा ऋण सहकारी संघका सचिव समेत हुन् । उनी २०५५ सालदेखि निरन्तर रुपमा सहकारी अभियानमा लाग्दै आइरहका छन् ।
